Leef minse
Per 1 juli bin ik penningmeister van “Hart voor Venlo” en wil ik mich efkes aan óg veurstelle.
Ik doon dit in mien mooders taal umdet ’t dialec mich ouk aan ’t hert leet en ik d’r aan wil mei.
Werke det dit neet verlaore geit.
’T Vereinigingslaeve haet mich altied aangespraoke. As kleine jóng bin ik wies mien 17 jaor lid gewaes van toen nog Scouting Francesco op de maagdenbergwaeg. Vanwaege studie en ouk andere interesses bin ik ein andere waeg ingeslage en oetgekómme in Grubbenvorst waor ik van 1983 wies 1992 raodslid bin gewaes beej Gekke maondaagsvereiniging De plaggenhouwers.
In 1993 weer truuk naor Venlo gegaon waor ik in 1995 lid bin gewaore van vastelaovesvereiniging de Wien en 22 jaor aktief bezig bin gewaes in diverse functies. De letste 3 jaor as 2e Penningmeister.
In die periode bin ik ouk weer truuk gegaon naor Scouting Manresa ( veurhaer Francesco ) waorvan ik in januari 1997 penningmeister bin gewaore. Umdet VV De Wien vuul tied in beslaag noom en ik ouk nog andere zake um hand had, heb ik in 2001 dit penningmeisterschap beej scouting opgezag.
Maar toen in 2008 de toenmalige penningmeister aangoof d’r mei te gaon stoppe en veur dergelijke functies moeilijk minse te kriege zien bin ik opniej benaderd gewaore en heb ik in januari 2009 dit penningmeisterschap weer opgepak, waat ik wies noow nog met vuul plezeer doon.
Veurig jaor heb ik beej De Wien aangegaeve det ik dit jaor gaon stoppe as aktief lid en bin dan ouk aafgeloupe juni aafgetraoje as 2e penningmeister beej vv De Wien.
Dit kwaam Bestuurslid Ger Lankreijer van “Hart veur Venlo” te huure en de link waas toen snel gelag.
Al gauw kwaam de vraog of ’t penningmeisterschap beej dees stichting niks veur mich waas want ze zoote met de hand in de haor umdet ouk heej dees functie vacant waas.
Veur mich toch weer ein nieje oetdaging met dezelfde functie maar dan in ein gans andere wereld die mich ouk aansteit umdet dees stichting zoë belangriek is en minselaeves kin redde.
Ik haop dan ouk nog lang lid te meuge zien van Hart veur Venlo en zal geliek wie beej die andere vereiniginge mien uuterste bes doon.
Met vrientelikke groet,
Ógge penningmeister
Boy Kolman